رباعيات الشاعر المصرى – احمد الهمامى

الشاعر المصرى –احمد الهمامى

القــرش زي القرش صـــــياد
وكـله للبيع والشرا يا عــــباد
يا هــــل ترى أنا تمني كــــــام
وامتي هكون سلعه في مـزاد
وآه
ولدي نصـــحتك تبقــــــــــــى مسلم في كـــــل أفعــــــالك
ومســــــــــــــيحي في جـــوازتك وتحـــــافظ على عـيالك
وتكون يـــــــــــهودي في الحـــــساب تنـجح في أشغالك
اسمع كلامي هتكسب آخرتك وتحافظ على بيتك ومــالك
وآه
معقوله ده يبقى جـزاته
اللـــي ضحى ليـك بذاته
واللي وهبك عمره كله
تهجره في آخـر حــياته
وآه
يا كل هــــمز ولمـــــز وغـــمـــز متداري
من صــــــحابي ومن حبايبي ومـن داري
إيــــــه الغــريب في إني عشقت وهـويت
لوكــــان ده عيب قــوموا اغسلوا عاري
وآه
أنا في الحياه عايش سُلِّـيــــطي مُلِّيطي
مملكش غير الكلام وصوتي وصويتي
صــــــــــحه مافيش فلوس مـــامعييش
إمتي هــــعيش في الدنيا بحـجم سيطي
وآه
يا كــــــــــــوخ مهـــجور على أرض بــور
لجلك يا كـــــــوخ أنا فــايت كنوز وقـصور
طمعان أنول جـواك الرضا وألقى السَّكِينه
ولو حتى كـــــــــــانت سكنتك زي القــبور
وآه
تمثال شهيد في وسط الميدان اتحــط
ونافوره ميـه قدامه بترتش وبتنـــقط
وقصاري فل وورد ونجيله زرعوها
إيه دخل الربيع! ولا الجنايني اتظبط
وآه
الحياه والموت الاتنين عليهم مغصوبين
دخلــــــــنا فيهم وخرجنا منهـم مرغمين
المــــــــوت بنكــرهه لكـــن له احترامه
أما الحـــــياه بنحبها بجــد ولا مضطرين
وآه
شريط حــياتي بســــــترجعه م الأول
معقول يـــا رب إزاي قـــدرت أتحول
من شـــــــــخص تـــــايه في الدروب
لشخص ناجح وعارف عكس عَملَوِّل
وآه
الميتين كــــــل يـــوم بيـــــــزوروني
صبح ومســــا واقفـين قـدام عيـوني
وبيســــألوني امــتى يا إنتَ هتــيجي
أرد أقـــــول: حَبَّه أهـلي يودعــوني
وآه
مين اللــي قال عــليا إرهــــابي
دا أنا عــربي مــسلم وفي كتابي
حــرم علــــــينا ربنــا قتل النفس
وسيدنا محــمد وصانا بكل كتابي
وآه
حـــان الأجــــــــل وخلاص هـــودع دنيتي
فــاضل ساعات وهفارق جسدي وصحبتي
يــــا رب لطـــــفك بالضعيف هَــــوِّن عليه
البدله حـــــمرا في ليله ســــودا يا ظُلمتي
وآه
عيني عليكي يا صبيه يا أم العيـــون زرقـا
عيونك دي بحر غويط وفيـــه كتير غـــــرقا
أنا قلبي مركب ورق عايمه على بحـــــورك
يا تروقي وتحني يا حلوه يا تقطعي الـــورقه
وآه
أوان الــورد راح عدى ولا بـــان حَمـــَارُه
وسألـــــــــت ليه وازاي قالـــوا دا اختياره
يــا ورد مستـــــــــــخسر فينــــا الفرح لـيه
دي رؤيتك يــا ورد بتطفي جوه القلب نـاره
وآه
بنتي يا روح قلبي جــــــالك النهارده عريـس
ومستعجل على الجواز وطلبه يبقى الخميس
أقوله آه ولا أقـــــــوله عيب اختشي يا ولــد
باطل ولا يـــــجوز جواز فؤاده مــن عتريس
وآه
قـــال الطبيب لينـــا خـــــلاص
مافيش أمل مـــافيش خــلاص
أنا قلـــــت حكـــــــمتك يـا رب
ده لســـه ماقــطعش الخـلاص
وآه
مــــعرفش لــيه بخاف مـنكم يا اخوان
مع إنـــــكم بدقون وكلامــكوا بالقرآن
يمــكن بخـــــاف تكـونوا مش صادقين
وجايز بخاف على عبد المسيح يتهان
وآه
أنا طـــــفل يتيم وقاعـــد هنا في الدار
لا ليا أهــــــل ولا عندي مـــال ولا دار
تعــالى زورني وهات معاك كلـمه أمل
واكفــلني تكسب ثـــواب ينجدك م النار
وآه
مســـجون وحيد في دنيا سجانه
بصــــــــرخ وبلطــــم وآه يـــانـا
سجــــن انفـــرادي يعني مـــوت
محــلاها اللمه لـــو في زنزانة
وآه
قالوا الوبــــــــاء والعدوى ماشيه في كل مكان
والمــــرض داير يلف وجاي جاي يا غلـــــــبان
أيها الساده الإنفلونزا جــايه بالخنازير والطيور
ما انــــت خـــــــــــلاص بقيت ملطشه يا إنسان
وآه

للمزيد من رباعيات الشاعر المصرى –احمد الهمامى بموقع:.http://www.robaeyat.com
Ww w. robaeyat .com